وفاقی حکومت نے آئندہ مالی سال 2026-27 کے لیے پانی، تعلیم اور صحت کے شعبوں میں ترقیاتی اخراجات بڑھانے کی تجویز دی ہے، جس میں پانی کا شعبہ سب سے زیادہ توجہ کا مرکز قرار دیا گیا ہے۔
پبلک سیکٹر ڈویلپمنٹ پروگرام (پی ایس ڈی پی) کے تحت پانی کے منصوبوں کے لیے 140.4 ارب روپے مختص کرنے کی تجویز دی گئی ہے، جو رواں سال کے 82.2 ارب روپے کے مقابلے میں نمایاں اضافہ ہے۔ اس اضافے سے ڈیمز، آبپاشی کے نظام اور طویل المدتی آبی تحفظ کے منصوبوں کو تقویت ملنے کی توقع ہے۔
اسی طرح تعلیمی شعبے کے لیے بھی بجٹ میں اضافہ تجویز کیا گیا ہے۔ ہائر ایجوکیشن کمیشن سمیت تعلیم کے لیے مجموعی طور پر 78.5 ارب روپے مختص کرنے کی تجویز ہے، جو گزشتہ سال کے 52.6 ارب روپے کے مقابلے میں تقریباً 49 فیصد زیادہ ہے۔
حکومتی ذرائع کے مطابق ان اقدامات کا مقصد سماجی شعبوں کی بہتری اور بنیادی سہولیات تک عوام کی رسائی کو مزید مؤثر بنانا ہے۔
