پنجاب حکومت نے مدارس کی رجسٹریشن کے طریقہ کار میں نرمی کا فیصلہ کر لیا ہے۔
تفصیلات کے مطابق وفاقی وزارتِ تعلیم کے تحت پہلے سے رجسٹرڈ مدارس کو نئی رجسٹریشن سے استثنیٰ دینے کی تجویز دی گئی ہے۔
مدارس کی رجسٹریشن سے متعلق ترمیمی بل متعلقہ قائمہ کمیٹی برائے داخلہ کے حوالے کر دیا گیا ہے۔
بل کے متن کے مطابق ڈائریکٹوریٹ جنرل مذہبی تعلیم سے رجسٹرڈ مدارس کو دوبارہ رجسٹریشن کرانے کی ضرورت نہیں ہوگی، جبکہ وفاقی سطح پر رجسٹرڈ مدارس پنجاب میں بھی دوبارہ رجسٹریشن کے پابند نہیں ہوں گے۔
قائمہ کمیٹی کی رپورٹ کے بعد ترمیمی بل کو حتمی منظوری کے لیے ایوان میں پیش کیا جائے گا، جس کے بعد اسے گورنر پنجاب کو ارسال کیا جائے گا۔
واضح رہے کہ اس سے قبل پنجاب حکومت نے دینی مدارس کے رجسٹریشن نظام کو یکجا کرنے اور سوسائٹیز رجسٹریشن ایکٹ میں ترمیم کا فیصلہ کیا تھا۔
نئی ترامیم کے بعد وفاق المدارس اور دیگر دینی بورڈز کے تحت رجسٹرڈ مدارس کو دوبارہ رجسٹریشن کرانے کی ضرورت نہیں رہے گی۔
