فیفاورلڈکپ،میٹا کےانسٹا گرام، فیس بک، واٹس ایپ اور دیگر ایپس میں نئے فیچرز متعارف

فیفا ورلڈ کپ 2026 کے آغاز کے ساتھ ہی میٹا نے اپنی مختلف ایپس میں فٹبال شائقین کے لیے متعدد نئے فیچرز متعارف کرانے کا اعلان کیا ہے۔ ان فیچرز کا مقصد صارفین کو میچز، ٹیموں اور کھلاڑیوں سے متعلق معلومات اور سرگرمیوں تک آسان رسائی فراہم کرنا ہے۔

کمپنی کے مطابق اس سلسلے میں براڈکاسٹرز، قومی ٹیموں، فٹبالرز، کمنٹیٹرز اور مختلف کریئیٹرز کے ساتھ شراکت داری کی گئی ہے تاکہ صارفین کو ورلڈ کپ کا زیادہ انٹرایکٹو تجربہ فراہم کیا جا سکے۔

میٹا کی مختلف ایپس میں اب لائیو اسکورز، رئیل ٹائم گفتگو، فٹبال کمیونٹیز، خصوصی تھیمز اور مصنوعی ذہانت (AI) پر مبنی ٹولز دستیاب ہوں گے، جن کے ذریعے صارفین ٹورنامنٹ سے جڑے رہ سکیں گے۔

تھریڈز میں لائیو فٹبال گفتگو

تھریڈز پر ورلڈ کپ کے دوران لائیو چیٹس کا اہتمام کیا جائے گا، جہاں شائقین میچوں سے متعلق فوری تبادلہ خیال کر سکیں گے۔ ان سیشنز کی میزبانی فٹبال سے وابستہ معروف شخصیات کریں گی۔

پلیٹ فارم پر ایک خصوصی فٹبال کمیونٹی بھی قائم کی جا رہی ہے، جہاں صارفین میچ ڈے مباحثوں میں حصہ لے سکیں گے، خیالات کا اظہار کر سکیں گے اور معلومات شیئر کر سکیں گے۔ اس کے علاوہ لائیو اسکورز، ٹیم فلیئرز، خصوصی اسٹیکرز اور ایموجی ری ایکشنز بھی فراہم کیے جائیں گے۔

انسٹا گرام اور فیس بک میں خصوصی اپ ڈیٹس

انسٹا گرام میں ایک مخصوص ورلڈ کپ ہب متعارف کرایا جا رہا ہے، جہاں ریلز، اسٹوریز، صارفین کی پوسٹس، براڈکاسٹرز کی کوریج اور مختلف ٹیموں سے متعلق اپ ڈیٹس ایک ہی جگہ دستیاب ہوں گی۔

مزید برآں، ڈائریکٹ میسجز کے لیے AI پر مبنی “گول” وائس ایفیکٹ اور فٹبال تھیم سے متاثر انیمیشنز بھی شامل کی جا رہی ہیں۔

فیس بک صارفین کے لیے خصوصی فٹبال موڈ متعارف کرایا گیا ہے۔ اس موڈ کو فعال کرنے کے لیے صارفین کو فیس بک لوگو پر دو مرتبہ کلک کرنا ہوگا، جس کے بعد خصوصی تھیمز، ری ایکشنز، سرپرائز فیچرز اور ایک فٹبال گیم دستیاب ہو جائے گی۔

میٹا AI کے “ویئر اٹ” فیچر کے ذریعے صارفین اپنی پسندیدہ ٹیموں کی جرسیوں کو ورچوئل انداز میں آزما سکیں گے اور تصاویر شیئر بھی کر سکیں گے۔

میسنجر اور واٹس ایپ میں نئے فٹبال فیچرز

فیس بک میسنجر میں لائیو میچ اپ ڈیٹس کا اضافہ کیا جا رہا ہے، جس کے ذریعے گول، ریڈ کارڈ اور دیگر اہم واقعات براہ راست گروپ چیٹس میں موصول ہوں گے۔ اس کے ساتھ فٹبال تھیم والے بیک گراؤنڈز اور اینیمیٹڈ اسٹیکر پیکس بھی دستیاب ہوں گے۔

واٹس ایپ میں عارضی طور پر فٹبال ایموجی کو ایونٹ کی آفیشل میچ بال سے تبدیل کیا گیا ہے، جبکہ صارفین کے لیے فٹبال تھیم پر مبنی ویڈیو کال ایفیکٹس اور نئے اسٹیکر پیکس بھی متعارف کرائے گئے ہیں۔

اس کے علاوہ واٹس ایپ میں ایک خصوصی فٹبال ڈکشنری شامل کی گئی ہے، جس میں اسکورز، ٹیموں کی معلومات، تازہ اپ ڈیٹس اور آفیشل چینلز کا مواد دستیاب ہوگا۔