اپر چترال: شندور پولو فیسٹیول 28 جون سےشروع ہوگا

0
23

اپر چترال میں تین روزہ سالانہ شندور پولو فیسٹیول 28 جون سےشروع ہوگا ،جس میں وزیراعلیٰ خیبر پختونخوا بطورِمہمان خصوصی شرکت کریں گے ۔

دنیا کے سب سے بلند 12ہزار فٹ اونچے شندور پولو گراؤنڈ پر چترال اور گلگت بلتستان کی پولو ٹیموں کے مابین کھیلے جانیوالے سپورٹس گالا میں دونوں صوبوں کے علاوہ وفاقی حکومت کی نمائندگی اور ملکی و غیر ملکی سیاحوں کی بھرپور شرکت متوقع ہے۔

اس ضمن میں تیاریوں کا جائزہ لینے کیلئے پشاور میں وزیراعلیٰ خیبر پختونخوا کے مشیر برائے سیاحت و ثقافت زاہد چن زیب کی زیرصدارت اہم اجلاس منعقد ہوا۔اس موقع پر واضح کیا گیا کہ خیبر پختونخوا حکومت سیاحت کی ترقی پر خصوصی توجہ دے رہی ہے اور شندور پولو فیسٹیول کا بہترین اور کامیابی سے انعقاد نا صرف محکمہ سیاحت ،بلکہ پوری صوبائی حکومت اور انتظامیہ کیلئے ٹیسٹ کیس ہے۔

مشیر سیاحت نے متعلقہ ڈپٹی کمشنرز کو یہ بھی ہدایت کی کہ پولو ٹورنامنٹ میں حصہ لینے والی ٹیموں کے کھلاڑیوں اور مقامی لوگوں سے الگ الگ ملاقاتیں کرکے انہیں انتہائی خوشگوار ماحول کے ساتھ اعتماد میں لیں، تاکہ وہ سب فیسٹیول کو ہر لحاظ سے کامیاب بنانے میں عملی طور پر شریک ہوں۔

کھلاڑیوں کیلئے شرٹس پر بہترین لوگو لگانے کی ہدایت بھی کی گئی، تاکہ محکمہ سیاحت و ثقافت کی عمدگی سے برانڈنگ ہو اور صوبے میں سیاحت خوب پھلے پھولے اور ملکی و غیر ملکی سیاحوں میں اضافے کے سبب صوبہ کی آمدن بالخصوص زرمبادلہ میںاضافہ ہو،کیونکہ سیاحت کی ترقی سے صوبہ کی خوشحالی جڑی ہے۔

Leave a reply