پہلےجھوٹ بولنااورپھرلوگوں کی ہمدردی لیناپی ٹی آئی والوں کاکام ہے،عظمیٰ بخاری

وزیراطلاعات پنجاب عظمیٰ بخاری نےکہاہےکہ پہلےجھوٹ بولنااورپھرلوگوں کی ہمدردی لیناتحریک انصاف والوں کاکام ہے۔
لاہورمیں پریس کانفرنس کرتےہوئےوزیراطلاعات پنجاب عظمیٰ بخاری کا کہنا تھاکہ پی ٹی آئی والے پکا منہ کرکے جھوٹ بولتے ہیں۔ ایک طرف والدین ترلے منتیں کرتے ہیں پھر باہر نکل کروہی زبان استعمال کررہے ہیں۔ جو 9 مئی دہرانے کےلئے تیار ہیں کیا رعایت کے مستحق ہیں۔الزام لگا کر مظلوم بننا ہیرو ازم اور سوشل میڈیا پر مشہور ہونے کا طریقہ ہے۔ انتشاروفساد کا ایندھن بننے والے بچوں سے ہمدردی ہے۔ وزیراعلیٰ پنجاب مریم نواز کی زیرصدارت ہر اجلاس صوبے کےعوام کی ترقی فلاح و بہبود کےلئے ہوتا ہے۔ اجلاس میں یہ نہیں ہوتا کسی کو پکڑ لواور گرفتار کر لو۔
اُن کامزیدکہناتھاکہ اگر اب بھی یہ 9 مئی کرنا چاہتے ہیں تو پھر معافی نہیں ملنا چاہیے۔بانی پی ٹی آئی عمران خان نے کبھی 9 مئی پر شرمندگی ظاہر نہیں کی۔ ایسی شخصیت کسی گناہ پر شرمندہ نہیں ہوتی، بلوائیوں کو ریلیف ملا تو 9 مئی باربار ہوگا۔ بلوائی اچھے لگنے والے لیڈر کو رعایت دلوانے کے لیے دھمکیاں دیتے ہیں۔ خیبرپختونخوا وزیراعلیٰ ہاؤس میں بلوائیوں کے اعزاز میں تقریب ہوتی ہے۔ اس کام سے جن کو معافی ملنا ہو ان کے بھی راستے بند کررہے ہیں۔
عظمیٰ بخاری کاکہناتھاکہ مہنگائی کا رونا نہیں رویا بلکہ عمل کرکے دکھایا۔ بڑے بڑے عالمی جریدے کہہ رہے پاکستان میں اسٹاک ایکسچینج ہو یا ڈیفسڈ ہو سب بہتر ہو رہا ہے۔ وزیراعظم شہبازشریف اوروزیراعلیٰ  مریم نوازکو خراج تحسین پیش کرتی ہوں۔ مہنگائی کےلیے دونوں نے کردار ادا کیا۔ بجلی کی قیمتوں نے معیشت اور بجٹ کو متاثر کیا۔ بجلی کے فی یونٹ پر 14 روپے اور مجموعی طور پر 54 ارب روپے کی سبسڈی دی۔ اب مفت سولر پروگرام دیا جا رہا ہے۔ 100 یونٹ والوں کو ضرورت کے مطابق سولر دیا جائے گا۔ مفت سولر کے لیے صارفین 8800 پر شناختی کارڈ نمبر کے ذریعے رجسٹر کروا سکتے ہیں۔ 200 یونٹ والوں کو 10 ارب بجٹ سے ایک لاکھ فری پینل دیں گے۔ میٹر خراب، ڈیفالٹ اور چوری کرنے والے صارفین کو مفت سولر نہیں دئیے جائیں گے۔ کسانوں کو ٹیوب ویلوں کے لیے سولر فراہم کریں گے۔