پی آئی اے نے برطانیہ کے فلائٹ آپریشن کی تیاریاں تیز کر دیں

فضائی مسافروں کیلئے خوشخبری، قومی ائیر لائن پی آئی اے نے برطانیہ کے فلائٹ آپریشن کی تیاری تیز کردی۔
برطانوی محکمہ ٹرانسپورٹ کے اجلاس میں قومی ائیر لائنز کو اجازت نامہ ملنے کی توقع ہے۔ جس کے بعد پی آئی اے پہلے مرحلے میں اسلام آباد سے براہ راست مانچسٹر پرواز چلانے کی منصوبہ بندی کررہی ہے،دوسرے مرحلے میں اسلام آباد اورلاہور سے لندن، برمنگھم شروع کرے گی۔
پی آئی اے انتظامیہ نے برطانوی فلائٹ آپریشن کے انتظامات مکمل کر لیے ہیں، گراؤنڈ ہینڈلنگ، کریو ہوٹلزکے ٹینڈرز جاری کردیئے گئے ہیں۔
ترجمان پی آئی اے کے مطابق برطانوی محکمہ ٹرانسپورٹ کی جانب سے فیصلے کا انتظار کررہے ہیں، مثبت فیصلہ آنے کی صورت میں فل فورآپریشن کا آغاز کر دیا جائے گا۔
ترجمان پی آئی اے کے مطابق برطانوی مارکیٹ پی آئی اے نیٹ ورک ایک انتہائی اہم روٹ ہے، مسافروں کو بین الاقوامی معیار کی اطمینان بخش سروسز مہیا کی جائیں گی۔
ترجمان کے مطابق پابندیوں سے قبل قومی ائیرلائنز کا یورپ برطانیہ روٹ کل آمدن 37 فیصد تھا، پی آئی اے برطانیہ فلائٹس آپریشن کے لیے بوئنگ 777 طیارے استعمال کرے گی۔
ترجمان پی آئی اے کے مطابق برطانیہ فلائٹ آپریشن کے لیے پہلے مرحلے میں ہفتہ وار3 پروازیں آپریٹ کی جائیں گی۔