ماس ٹرانزٹ اتھارٹی نے محرم الحرام کے موقع پر سکیورٹی اور ٹریفک انتظامات کے پیشِ نظر مختلف شہروں میں بس سروسز عارضی طور پر بند رکھنے کا اعلان کر دیا ہے۔
اتھارٹی کے مطابق لاہور، راولپنڈی، اسلام آباد اور ملتان میں میٹرو بس، الیکٹرک بس اور سپیڈو بس سروسز 9 اور 10 محرم کو دستیاب نہیں ہوں گی۔ یہ فیصلہ جلوسوں اور مجالس کے دوران سکیورٹی انتظامات کو مؤثر بنانے کے لیے کیا گیا ہے۔
دوسری جانب اورنج لائن ٹرین سروس کے اوقاتِ کار اور روٹس میں کوئی تبدیلی نہیں کی گئی۔ مسافر معمول کے مطابق اورنج لائن ٹرین کی سہولت سے استفادہ کر سکیں گے۔
ماس ٹرانزٹ اتھارٹی کا کہنا ہے کہ بس سروسز کی معطلی عارضی نوعیت کی ہے اور محرم کے بعد تمام سروسز معمول کے مطابق بحال کر دی جائیں گی۔
حکام نے شہریوں سے اپیل کی ہے کہ سفر کی منصوبہ بندی کرتے وقت متبادل ذرائع آمدورفت کو مدنظر رکھیں اور انتظامیہ کی جانب سے جاری کردہ ہدایات پر عمل کریں۔
