حکومت نے شہریوں کی سہولت کیلئے ملک بھر میں پولیس کریکٹر سرٹیفکیٹ کا نظام یکساں کر دیا ہے۔
وزارت داخلہ کے مطابق بیرون ملک سفر کرنے والوں اور ملازمت کے امیدواروں کی آسانی کیلئے پہلی بار چاروں صوبوں، گلگت بلتستان اور آزاد کشمیر کا ڈیٹا ایک مرکزی نظام میں ضم کر دیا گیا ہے۔
اعلامیے میں کہا گیا ہے کہ اب شہریوں کو مختلف صوبوں سے الگ الگ کریکٹر سرٹیفکیٹ حاصل کرنے کی ضرورت نہیں ہوگی بلکہ صرف نیشنل پولیس بیورو سے ہی یہ سہولت دستیاب ہوگی۔
وزارت داخلہ کا کہنا ہے کہ نیشنل پولیس بیورو میں پاکستانی شہریوں کا مرکزی ریکارڈ محفوظ کر لیا گیا ہے، جس کے بعد ملک بھر کے شہریوں کو ایک ہی جگہ سے کریکٹر سرٹیفکیٹ جاری کیا جا سکے گا۔
حکام کے مطابق پولیس ویری فکیشن کا عمل بھی اب پہلے سے زیادہ تیز ہو جائے گا کیونکہ نظام کو مرکزی ڈیجیٹل پلیٹ فارم سے منسلک کر دیا گیا ہے۔
رپورٹس کے مطابق شہری گھر بیٹھے آن لائن پولیس کریکٹر سرٹیفکیٹ حاصل کرنے کی سہولت سے بھی فائدہ اٹھا سکیں گے۔
