ورلڈکپ کوالیفائرز : جناح سٹیڈیم میں فیفا معیار کی لائٹس نصب

پاکستان ٹوڈے: ورلڈکپ کوالیفائرز میچز کے انعقاد کیلئے جناح سٹیڈیم میں فیفا معیار کی لائٹس نصب کردی گئیں۔

فیفا ورلڈ کپ کوالیفائرز میں پاکستان بمقابلہ سعودی عرب کے میچ کیلئے پاکستان فٹبال فیڈریشن (پی ایف ایف) نے اسلام آباد کے جناح سٹیڈیم میں لائٹس پر ایشین فٹبال کنفیڈریشن (اے ایف سی) کو اپ ڈیٹ کردیا۔

پی ایف ایف نے اپنے خط میں لکھا ہے کہ اسلام آباد کے سٹیڈیم میں فیفا معیار کے مطابق لائٹس لگا دی گئی ہیں،تاہم ذرائع کا کہنا ہے کہ اے ایف سی نے پی ایف ایف سے لائٹس کے معیار کی تصدیقی دستاویزات مانگ لی ہیں، جس کے بعد پی ایف ایف نے تصدیقی دستاویزات کی فراہمی کیلئے پاکستان سپورٹس بورڈ کو خط لکھ دیا ہے۔ذرائع کے مطابق دستاویزات کی فراہمی کے بعد اے ایف سی کا جائزہ وفد اسلام آباد کا دورہ کرے گا۔ فیفا ورلڈ کپ کوالیفائرز راؤنڈ ٹو میں پاکستان اور سعودی عرب کے درمیان میچ 6 جون کو اسلام آباد میں ہوگا۔