جابز پورٹل لنکڈان میں پہلی بار گیمز متعارف

0
12

(پاکستان ٹوڈے) سوشل میڈیا پلیٹ فارم لنکڈان کا استعمال بیشتر افراد ملازمت کی تلاش کیلئے کرتے ہیں اور عموماً اسی سے متعلق فیچرز متعارف کرائے جاتے ہیں، مگر اب مائیکرو سافٹ کے زیر ملکیت سوشل میڈیا پلیٹ فارم نے گیمنگ کے شعبے میں بھی قدم رکھ دیا ہے۔

تفصیلات کے مطابق اس مقصد کیلئے لنکڈان میں ورڈل جیسی پزل گیمز کو متعارف کرایا گیا ہے۔کمپنی کی جانب سے 3 گیمز کو سوشل میڈیا پلیٹ فارم کا حصہ بنایا گیا ہے۔ ان میں سے ایک گیم پن پوائنٹ ہے، دوسری کوئنز، جبکہ تیسری کراس کلائمب ہے۔کمپنی کی جانب سے انہیں ذہن کو مصروف رکھنے والی گیمز قرار دیا گیا ہے اور ہر گیم کو ایک فرد دن بھر میں صرف ایک بار کھیل سکے گا۔

البتہ گیمز کھیلنے والے اپنے سکورز کو دوستوں کے ساتھ شیئر کر سکیں گے۔لنکڈان کی جانب سے صارفین کی کامیابی کے ریکارڈ کو بھی ٹریک کیا جائے گا ،تاکہ وہ روزانہ گیمز کھیلنے کے لیے واپس آئیں۔

لنکڈان کے صارفین کی تعداد ایک ارب سے زائد ہے، جو اسے ملازمت کی تلاش یا دیگر مقاصد کے لیے استعمال کرتے ہیں،مگر کمپنی کو توقع ہے کہ گیمز کے اضافے سے سائٹ پر صارفین کی انگیج منٹ بڑھ جائے گی۔

Leave a reply