سیاحوں کیلئے خوشخبری : پانچ ماہ بعد ناران کے تمام راستے کھل گئے

سیاحوں کیلئے بڑی خوشخبری، پانچ ماہ بعد وادی ناران کے راستے کھل گئے۔
جنت نظیر وادیوں ناران کاغان جانے کے خواہش مندوں ملکی و غیر ملکی سیاحوں کے لئے اچھی خبر یہ ہے کہ برفباری اور لینڈ سلائیڈنگ کے باعث تقریباً پانچ ماہ کی بندش کے بعد ناران جانیوالے تمام راستوں کو سیاحوں کے لئے دوبارہ کھول دیا گیا۔کاغان سے ناران تک چھوٹے بڑے سات گلیشیئرز ہٹا کر این ایچ اے نے ریکارڈ وقت میں اہم شاہراہ کو کھول کر تفریحی مقام کی رونقیں دوبارہ بحال کر دی ہیں۔
مرغزاروں کی سرزمین مانسہرہ کے تفریحی مقام کے راستے کھلتے ہی سیاحوں نے وادی ناران کا رخ کر لیا ہے۔
نیشنل ہائی وے اتھارٹی کے ترجمان کا کہنا ہے کہ دو ہفتوں میں بابو سر ٹاپ کا راستہ کھول کر گلگت بلتستان تک رسائی دی جائے گی، جس سے بلاشبہ خیبرپختونخوا کے سیاحتی مقامات سمیت شمالی علاقہ جات کا رخ کرنیوالے سیاحوں کو آسانی فراہم ہو گی اور ملکی سیاحت کو فروغ ملے گا۔