موٹرویز پر نگرانی کیلئے بائیک سروس پائلٹ پروجیکٹ شروع کرنے کا فیصلہ

موٹرویز پر سفر کرنیوالے مسافروں کیلئے اہم خبر،پاکستان کی اہم ترین شاہراہوں کی نگرانی کیلئے بائیک سروس پائلٹ پروجیکٹ شروع کرنے کا فیصلہ،وفاقی وزیر مواصلات کی ہدایت پر موٹرویز پر سکیورٹی و سرویلنس کیلئے موٹر بائیک سروس پائلٹ پروجیکٹ شروع کرنے کا فیصلہ کرلیا گیا۔
وفاقی وزیر مواصلات عبدالعلیم خان کا کہنا ہے کہ موٹروے پر بیک وقت 30سے35موٹر بائیکس کو مختلف سیکٹرز میں پٹرولنگ کرتے رہنا چاہیے، پہلے مرحلے میں موٹروے پولیس اپنے وسائل سے بائیک سروس شروع کرے،مزید اضافہ کریں گے، این ایچ اے، موٹروے پولیس، ایف ڈبلیو او اور ضلعی پولیس مشترکہ اقدامات یقینی بنائے۔
موٹروے کے گرد حفاظتی باڑ کی چوری کی روک تھام کیلئے موثر حکمت عملی اختیار کی جائے۔مسافروں کی حفاظت کیلئے موٹروے پولیس کو زیادہ سے زیادہ ذمہ داری لینا ہوگی، ایسا میکنزم اختیار کریں کہ موٹروے پر سفر کو زیادہ سے زیادہ محفوظ بنایا جا سکے، موٹروے پر جہاں باڑ چوری کے واقعات زیادہ ہیں، اُن کی نشاندہی کریں، جس علاقے میں باڑ چوری ہوگی ،وہاں کا این ایچ اے آفیسر اور موٹروے پولیس ذمہ دار ہوگی۔
موٹروے پولیس کے اختیارات کیلئے قانون سازی میں ترمیم کی تجویز بھی سامنے آئی ہے۔ان اقدامات کا مقصد موٹر ویز پر سفر کرنیوالے مسافروں کے سفر کو محفوظ، یادگاراور خوشگوار بنانا ہے۔