برطانیہ جا کر تعلیم حاصل کرنے کے خواہشمند پاکستانی طلبا کیلئے اہم خبر

برطانیہ جا کر پڑھنے کے خواہشمند پاکستانی طلبا وطالبات کیلئے خوشخبری،برٹش کونسل پاکستان نے برطانیہ میں اعلیٰ تعلیم حاصل کرنے کے خواہشمند پاکستانیوں کو جلد درخواست جمع کروانے کی ہدایت کر دی۔
برٹش کونسل پاکستان کی جانب سے سوشل میڈیا پلیٹ فارم ایکس پر جاری بیان میں کہا گیا ہےکہ اگر پاکستانی طلبا نے حال ہی میں اپنے تعلیمی امتحانات کے نتائج حاصل کر لیے ہیں اور برطانیہ میں اعلیٰ تعلیم حاصل کرنے کا ارادہ رکھتے ہیں تو فوری طور پر یو کے سٹوڈنٹ ویزا کیلئے درخواست دیں۔
برطانوی حکومت کی جانب سے جاری کردہ اعلامیے کے مطابق طلبہ کو مشورہ دیا گیا ہے کہ وہ ویزا درخواست دینے میں تاخیر نہ کریں۔درخواست دینے کیلئے ضروری ہے کہ پاکستانی طلبا کے پاس یونیورسٹی کی جانب سے جاری کردہ CAS ریفرنس نمبر موجود ہو اور تمام ضروری دستاویزی ثبوت تیار ہوں۔
طلبا ویزا کیلئے آن لائن درخواست حکومت برطانیہ کی ویب سائٹ پر دے سکتے ہیں۔ وقت پر درخواست دینے سے ویزا کے عمل میں تاخیر سے بچا جا سکتا ہے اور طلبا اپنی تعلیم بروقت شروع کر سکتے ہیں۔